KALIBO, Aklan—Bangud sa ginaeauman nga pagbuhos it mga beachgoers sa Navitas beach sa banwa it Numancia, limitado eamang it hasta alas 5:00 it hapon ro pagpaligos sa kahabaon it nasambit nga baybayon.
Raya hay nakabaehag sa ginbaeay nga resolusyon it barangay council it nasambit nga lugar bilang pagpahaum sa selebrasyon it kapiestahan ni Sr. San Juan de Bautista hin-aga nga adlaw it Biyernes, Hunyo 24.
Suno kay punong barangay Frany Reyes it nasambit nga lugar nga matapos nga makipagpueong kay P/Maj. Fidel Gentallan, hepe it Numancia PNP hay nagpaguwa sanda it resolusyon kun sa siin dikara nakaplastar ro mga sueundanan para sa seguridad it mga beachgoers.
Nasayuran nga sambilog ro Navitas sa mga ginadayo kada selebrasyon it San Juan.
Gintaw-an sigon nanda it kopya it resolution ro mga cottage and resort owners.
Ginahinyu sa mga raya ro andang kooperasyon pinaagi sa pagbantay sa andang mga guests.
Hugut nga ginabawae it mga otoridad ro pagdaea it mga makamaeatay nga nga hinganiban mag-eowas sa mga kutsilyo nga ginagamit nga panghiwa sa andang mga gina-eaha ag likawan nga magpahilong agud nga malikawan ro maduguon nga insidente.
Kaibahan sa deployment plan ro augmentation it mga katapo it MDRRMO-Numancia, Municipal auxiliary police bilang kabulig it mga katapo it kapulisan, Philippine Coast Guard ag mga tanod.
Bangud nga medyo mahaba ro shoreline it Navitas, aminado ro konseho nga mabudlay para kanda nga ma-monitor ro tanan nga mga nagapaligos eabi eon ro mga inunga.
