Nagpataliwan it magdamag sa opisina it National Bureau of Investigation (NBI) sa syudad it Pasay si dating Negros Oriental Rep. Arnolfo “Arnie” Teves Jr.
Ginpahayag ni NBI Director Jaime Santiago, nga andang ginpagbigyan ro hinyo kara bilang konsiderasyon bangud sa kagaoy halin sa biyahe sa Timor Leste.
Pasado-alas-12 it tungang-gabie it Mayo 30 kat nag-abot ro dating mamalidha sa NBI. Nagpasaidaeom raya sa pag-usisa it doctor antes raya bue-an it fingerprints ag pilang documentary procedure.
Umabot man sa NBI office ro abogado ni Teves nga si Atty. Ferdinand Topacio maging ro ina it dating mamalidha nga si Zenaida Teves.
Suno kay Atty. Topacio, nga eubos ro kasabikan it kara bangud sa masobra daywang dag-on sandang uwa nagkita.
Gindayaw ni Topacio si NBI Director Jaime Santiago bangud sa pagsugot kara nga temporaryong magtinir si Teves sa andang opisina antes halininon sa detention facility.
May tikang man sigon nga ginahimo para depensahan ro mga kasong ginapangatubang it dating mamalidha.
Madumdumang ginaturo nga utak si Teves sa pagpatay kay dating Negros Oriental Governor Roel Degamo.
