KALIBO, Aklan–Sa kabilugan nga 47.60 hectares nga taeamnan it mais hay 78.63 percent kara ro natigayon nga nahalitan it pagpanaeasa it peste nga fall army worm.
Suno kay Flordeliza Cortes it Office of the Provincial Agriculture (OPA), ro mga banwa nga nagsumiter it damage incident ag sanda ro may mga existing standing crops hay ro munisipyo it Altavas, Banga, Ibajay, Kalibo, Libacao, Madalag, Numancia, Malinao ag Nabas.
Ro nasambitang mga banwa hay validated eon it regional crop protection center kon sa siin nakumpirma nga fall army worm ro nagpanaeasa sa andang katamnan partikular it mais.
Bangud kara, insigidang naghueag ro andang mga technician kon sa siin gintaw-an it nagakaigo nga impormasyon ro mga mangunguma kaangot sa peste kamana man ginlaygayan ro mga raya nga magpatigayon it community spraying.
Ginpahayag dugang ni Cortes nga uwa eon sanda naalarma makaron bangud nga amat-amat eon nga nakokontrol ro peste nga ginapatihan nga naghalin sa ibang lugar nga nakaabot sa Aklan pagkatapos it bagyong Ursula.
Sa makaron sigon hay nagapadayon ro andang monitoring ag sigidas man ro andang padumdom sa mga mangunguma sa mga pwedeng himuon agud daeayon nga matapna ro pagpanaeasa it nasambitang peste.
