KALIBO, Aklan — Bangud sa kapas-eawan sa paghigugma rason nga nahimo nga magbigti it sangka eaeaki sa Brgy. Cortes, Balete.
Haeos nagapang-gaob eon ro itsura kat masapwan ro biktima nga nakabitin sa baeayan sa balcony it ikaywang panaeagan it baeay nga gina-istaran.
Nasayuran nga si certain “Tony”, 26, ag caretaker it farm it manukan ag mga tanum nga dragon fruit sa nasambit nga lugar.
Base sa report ni P/Corporal Ardiolyn Mendoza it Balete Police Station nga ro daywang kaeaeakin-an nga mismong mga kaibahan kara sa farm ro nakadiskubre sa nakabigting eawas it eaeaki gamit ro eubid.
Base sa panaysayon it pamilya it biktima , antes ro insidente hay natukiban it eaeaki nga mag-eowas kana hay may iba pang karelasyon ro anang nobya.
Ginpahayag dugang nga antes nga nagpakamatay hay nag-text raya sa anang nobya nga pagatapuson eon kara ro anang kabuhi.
Narekober maeapit sa bangkay ro cellphone it biktima nga samad matapos nga gin-eampos kara ag daywang bote it aeak.
Samtang, nagapati ro pamilya nga owa it foul play sa insidente rason nga owa eon nanda ginpa-autopsy ro bangkay it biktima.
