KALIBO, Aklan—Handum it Filipino community nga kapareho it Japan hay maging haum man ro Pilipinas sa anuman nga mga sakuna partikular ro pagtama it linog .
Suno kay Bombo International Correspondent Rowena Relente, tubong Aklan ag presenteng nagatrabaho sa Japan nga sa unang kahigayunan hay nasaksihan nana ro pagtama it mabaskog nga linog, Lunes it gabi-i sa Tokyo ag mga kaiping nga lugar nga nagpahueag sa mga building sa sueod it pilang segundo.
Pagkatapos suno kana it pag-uyog hay otomatiko nga nag-flash sa andang TV screen ro abiso it Japan Meteorological Agency nga ro linog hay may kabaskog nga magnitude 4.5 ag ro sentro hay sa parte it Chiba Prefecture, nga kaiping it Tokyo nga may kadaeumon nga 70 kilometro.
Sa pihak it natabu, kalmado nga nagbalik sa andang mga oeobrahon ro mga pumueuyu bangud nga haeos sanay eon sanda ag sayod eon nanda ro mga dapat nga obrahon kamana man nga may andang ginasunod nga seismic code nga kaabuan hay naghalin sa andang mga leksyon nga natun-an sa mga nag-agi nga kalamidad.
Ro building nga andang gina-istaran sigon hay earthquake resistant ag makasarang it hasta sa magnitude 6 nga linog rason nga matsa ginduyan eamang sanda .
Samtang, ginpahayag pa ni Relente nga base sa mga impormasyon, owa it nailistang kahalitan matapos ro linog ag owa it napabalita nga Pilipino nga naninahan .
