KALIBO, Aklan—Gin-gisa it pilang miyembro it sanggguniang bayan it Kalibo ro Kalibo Sr. Sto. Nino Ati-Atihan Management Council, Inc. ukon KASSAMACO sa pagpatawag kanda it konseho may kaangtanan sa paghimay sa andang ginsumite nga statements of income and expenses sa nagtaliwan nga 2020 Ati-Atihan festival.
Suno kay SB member Augusto Tolentino nga may pila sanda nga mga pangutana nga indi masabat it nasambit nga festival organizer bangud sa kawad-an it mga supporting documents.
Partikular sigon nana nga ginbusisi ro bayad sa gin-imbitahan nga daywang celebrity host nga ro talent fee hay naga-abot sa P200,000 ro kada isaea nga may kabilugan nga P400,000.
Apang owa sanda it may maipakita nga kontrata ag mga resibo.
Nataeupangdan dugang nga may mga koleksyon ro KASSAMACO eabi eon sa mga stalls sa magsaysay park, pastrana park, covered court, ag iba pang mga kiosks nga ginasugid nga owa na-remit sa Municipal Economic Enterprise and Development Office ukon MEEDO.
Raya hay ginkumpirma mismo it head kara nga si Engr. Jessie Figarido.
Naga-abot sigon sa minilyong piso ro eakot nga kwarta.
Ginpromisa sigon it festival organizer nga pagabayaran eon lang nanda raya bangud nga nagastos ro ibang pondo kamana man nga paga usisaon ro iba pang parte it financial statement nga ginakwestiyon.
Nangawa man sigon ro opisyal kon ham-an todo-dayaw pa si municipal treasurer Rey Villaruel sa KASSAMACO maskin nga palpak ro andang pagdumaea.
Pwede sigon sanda nga magapanabat kara sa anti graft and corrupt practices act.
