KALIBO, Aklan — Nagapabilin sa baeay paboengan ro sangka babayeng flight attendant matapos ro anang pag-self quarantine sa Aklan Provincial Hospital.
Sa ginpatigayon nga press conference, ginpahayag ni Dr. Cornelio Cuatchon it Provincial Health Office (PHO), nagdesisyon ro 24-anyos nga flight attendant nga taga-Cavite nga magpa-self quarantine matapos nga makabatyag it flu-like symptoms.
Ginpa-eksamin eon sigon ro specimen it pasyente sa Research Institute for Tropical Medicines agud masayuran kung nag-positibo sa novel coronavirus.
Nasayuran nga pagkatapos nga makabatyag it pilang sintomas it virus kasunod it andang flight sa Wuhan City sa China hay nagkonsulta raya sa doctor nga imaw ro nag-refer kana para magpa-quarantine sa ospital agud makasigurado.
Ginklaro man it pasyente nga uwa imaw nakaangkon it direct contact sa mga naging pasahero kara halin sa nasambitang siyudad.
Nasayuran nga sa bug-os nga Pilipinas, ro Kalibo International Airport eamang ro may direct flight sa Wuhan, China.
May daywang flight raya kada adlaw sa paeoparan, kon sa siin, ro pasahero hay may average nga 150 hasta it 200.
Bangud kara, ginpahayag ni Dr. Lovell Labindao it Bureau of Quarantine nga mag-eowas sa mano-mano nga pag-check sa mga pasahero halin sa nasambitang siyudad hay nagaagi pa ro mga raya sa thermal scanner.
