Ginkumpirma ni dating Pangueong Rodrigo Roa Duterte nga ginmanduan nana si dating Philippine Charity Sweepstakes Office General Manager Royina Garma nga mag-usoy it mga pulis para magamit sa kampaniya kontra sa iligal nga droga.
Madumduman sa naging pagbulgar ni Garma sa ulihing pagpamati it Quad Committee, ginhambae kara nga gintawagan imaw ni Duterte ko May 2016 ag ginapausoy imaw it mga pulis nga miyembro it Iglesia Ni Cristo nga may kapabilidad nga mag-implementa sa drug war base sa ‘Davao model’, butang nga ginhimo man sigon ni Garma.
Angot kara, gin-ako ni Duterte nga minatuod nga ginmanduan nana si Garma nga mag-usoy it mga pulis nga miyembro it nasambit nga sekta.// suno kana, masaligan ro mga nasambit nga pulis sa anumang ‘ipatrabaho’ ag sa kwarta ukon sa pondong igatao kanda.
Apang, uwa eon gindetalye it dating presidente kon anong proyekto ro anang ginatumod nga posibleng ginpabuyot sa mga nasambit nga pulis.
Sa pihak kara, ginklaro it dating presidente nga uwa nana ginmando sa mga pulis nga pumatay it mga drug personalities kabaylo it natungdan nga kantidad.
