Ginapahauman eon it Land Transportation Franchising and Regulatory Board (LTFRB) ro distribusyon it fuel subsidy sa mga driver ag operator it public utility vehicles (PUV).
Raya hay kadungan it nagahana nga pagtaas it presyo sa mga produktong petrolyo nga ginaeaumang masundan pa sa mga paaeabuton nga inadlaw.
Suno kay LTFRB Chairperson Vigor Mendoza, kaibahan sa mga pagpahaom ro koordinasyon sa mga organisasyon ag kooperatiba agud maabisuhan sanda sa mga kinahang-eanon oras nga mag-umpisa eon ro pagpanupod it bulig.
Ginapapasiguro it nasambit nga taeatapan nga may bastante ag eksaktong documentary requirement agud maipadaea eagi ro pondo sa mga benepisyaryo sa oras nga may go signal eon para umpisahan ro rollout it fuel subsidy.
Gusto man it LTFRB nga masiguro nga ro tanan nga operator hay makaangkon it card kon sa siin iga-download ro fuel subsidy sa pinaagi it state-operated ag government-owned bank.
Makaron nga dag-on, nagtaeana ro Department of Transportation (DOTr) it kapin sa P2.5 bilyon nga pondo para sa fuel subsidy program nga ginaeauman nga igapanupod sa tanan nga sektor it pampublikong transportasyon.
Pagaumpisahan ro pagpanupod it fuel subsidy kon umabot eon sa $80 per barrel ro presyo it langis sa pangkalibutanong merkado.
