KALIBO, Aklan—Ginabantayan eon it mga basketball fanatics ro game 2 sa tunga it Boston Celtics ag Dallas Mavericks bandang alas-8:00 it agahon oras sa Pilipinas nga igapatigayon sa TD Garden sa Boston, Massachusetts sa Estados Unidos sa best of seven series it National Basketball Association ukon NBA finals.
Maskin nga nagpusta sa Dallas Mavericks, ginapan-aw sa gihapon suno kay Bombo International Correspondent Ken Steven Lachica nga base maadto eon man ro pabor ag bola sa Boston Celtics bangud sa homecourt advantage.
Sanda sa Oklahoma City hay sa Dallas ro andang cheers bangud nga kaeapit-banwa eamang nanda raya ag mas napupusan nanda ro mga manughampang it nasambit nga koponan.
Maskin sa andang trabaho sigon hay mainit nga ginaistoryahan ro ginaabangan makaron nga hampang sa tunga it daywang koponan.
Madumduman nga naangkon it Boston Celtics ro unang pagdaog sa NBA Finals kontra sa Dallas Mavericks sa score nga 107-89.
Naging mabahoe nga bulig sa pagdaog it Celtics ro pagbalik sa hampang ni Kristaps Porzingis matapos nga nagmayad sa andang right calf injury.
Pagatinguhaon sigon it Celtics nga madoble ro pagdaog sa Game 2 nanda it Mavericks makaron nga adlaw it Lunes.
