Sangka grupo it mga mabangis nga amo ro nagapang-atake sa mga residente it sangka siyudad sa Japan!
Napabalita nga nag-umpisa ro pag-atake it mga amo sa Yamaguchi city ko unang domingo it Hulyo kun sa siin ginsueod it Macaque monkey ro sangka baeay ag ginkaeos ro eapsag nga naga-istar kara.
Umpisa kato, nagsunud-sunod eon ro mga kaso it pag-atake it mga amo sa mga residential area.
Maskin nga makabig nga minor injuries eamang ro mga naangkon nga angkit ag kaeos it mga biktima, ginka-alarma raya it mga awtoridad it Yamaguchi.
Sa sueod it tatlong domingo, nakalista eon ro Yamaguchi city police it 50 nga monkey related attacks.
Suno sa mga awtoridad, napalibutan it mga bukid ro Yamaguchi ag ordinaryo eon nga makakita it amo sa andang siyudad apang makaron eamang natabu ro mabangis nga pag-atake it mga raya sa mga residente.
Agud nga mapundo eon ro pag-atake, nagbo-oe ro siyudad it specially commissioned hunters nga magadakop sa mga amo gamit ro tranquiliser gun.
Ko nagtaliwan eamang nga Hulyo 27, may nadakpan nga Macaque monkey nga ginadudahan nga sambilog sa mga amo nga nag-atake sa mga residente.
Sa pihak nga may nadakpan eon nga mga amo, padayun gihapon sa pagdahan ro mga residente it Yamaguchi city bangud nga nagapati sanda nga maabu pang mabangis nga amo ro nagalibot-libot sa andang siyudad.
