Nag-umpisa eun ro Gilas Pilipinas sa pagpahaom para sa 31st Southeast Asian Games nga maga-umpisa sa masunod nga buean sa Hanoi, Vietnam.
Nagpaidaeum sa pilang drills ro Gilas Pilipinas pool sa Moro Lorenzo Sports Center kun sa siin mismong si Gilas head coach Chot Reyes ro nagatutok sa ensayo.
Nag-abot sa training sanday June Mar Fajardo, Kevin Alas, Robert Bolick, Kib Montalbo, Troy Rosario, Poy Erram, Mo Tautuaa ag Isaac Go.
Bukon man it kaibahan ro iba pang players bangud may tagsa-tagsa pa rayang aktibidad.
Kabahin it Gilas Pilipinas pool sanday Dwight Ramos ag Thirdy Ravena nga presenteng una sa Japan kaibahan ro andang tagsa ka mga grupo sa Japan B.League.
Nagpaidaeum man sa lasik surgery si Roger Pogoy ag presenteng nagapahuway samtang una sa bakasyon pa sa ibang nasyon si Matthew Wright.
Owa man si Japeth Aguilar nga may ginabatyag nga calf injury.
Kaibahan si Aguilar it Barangay Ginebra nga una sa finals it PBA Governors’ Cup.
Target it Pinoy cagers nga masugpunan ro dominasyon kara sa SEA Games kun sa siin nakuhit it Pilipinas ro 18 bueawan nga medalya ko nagtaliwan nga ika-20 nga edisyon it biennial meet.
