BANGA, Aklan—Arestado sa banwa it Banga ro sangka eaeaki nga ginreklamo it pagpanghimueos sa sangka menor de edad sa banwa it tangalan, bandang alas-8:30 it agahon it Sabado, Pebrero 1, 2025.
Suno kay PCapt. Moonyen De Joseph, hepe it Tangalan Municipal Police Station, nadakpan nanda sa entrapment operation kaina ro suspek nga si Stanley Mercado.
Nasayuran nga matapos nga himuslan ro 17 anyos nga dalagita ko enero 29 hay gintakaw pa kara ro cellphone it biktima ag ginhana nga ibaligya pinaagi sa social media.
Ro mismong hepe it Tangalan MPS ro nagpakuno-kuno nga buyer ag makataliwan ro ap-at nga adlaw nga transaksyon hay natigayon raya nga maaresto.
Ginsaysay it dalagita nga may nakita imaw nga job hiring sa social media nga nagakinahangean it babaye nga assistant sa bakery ro tiya it suspek.
Bangud nga interesado hay nakipagkita imaw sa suspek .
Matapos nga himuslan hay gin-eu-ok ag ginhuoeg sa bangin ro biktima, apang maswerteng nabuhi ag nakasugid sa mga otoridad.
Bangud kara, insigidang ginplano ro operasyon agud nga madakpan ro eaeaki.
Narekober kay Mercado kaina ro cellphone it biktima, P2,000 nga gingamit sa pagbakae it gadget ag sangka kalibre it baril nga kargado it limang bala.
Patong-patong kaso ro posibleng paga-atubangon it suspek bangud nga mag-eowas sa kasong rape, child abuse ag robbery hay may ginapatuman nga comelec gun ban sa makaron.
Ro operasyon hay pinaagi sa gintingub nga pwersa it Tangalan, Kalibo ag Banga Municipal Police Station.
Laygay man ni P/Capt de Joseph nga indi magpadaea-daea sa mga ginatanyag nga anuman nga bagay kabaylo it pagsunod sa mga bukon it kakilaea.
