KALIBO, Aklan — Haeos indi makapati ro sangka ginang bangud sa pihak it anang pag-alaga hay nahimo pa imaw nga takawan it P2.7 milyon it anang ampon sa Sitio Tapo-Tapo, Brgy. New Buswang, Kalibo.
Ginreklamo ni Arlyn Cabugatan, 53, sangka negosyante, taga Davao ag presenteng naga-istar sa nasambit nga lugar ro suspek nga si Jerryl Nabor, 26, tubong Madalag, Aklan ag naga-istar sa anang baeay.
Suno kay Cabugatan, nagdangop sanda sa Kalibo Police Station kat matukiban nga owa eon ro anang kwarta nga binaligyaan it anang eugta sa Davao.
Nasayuran nga mabahoe ro pagsalig it ginang sa suspek bangud haeos 13 anyos eon nana raya nga gin-alagaan.
Samtang, sa ginpatigayon nga follow-up operation it gintingub nga pwersa it Kalibo ag Malay Police Station, naaresto ro suspek sa Caticlan Jetty Port ag paagto kunta sa Manila sa anang magueang.
Narekober kana ro tinakawan nga kwarta, apang kueang eon it haeos P79,000.
Ginasugid nga na-trace ro ginakahimtangan it suspek matapos nga mabuksan ro anang messenger sa Facebook.
Pagapasakaan si Nabor it kasong qualified theft.
