NATIONAL News — Gin-aprubahan it House of Representatives ro proposed bill nga nagapanaba sa PhilHealth premium contribution rate halin 5% paagto sa 3.5%.
Ro House Bill 11357 hay nagatuyo nga pabaskugon ro sistemang pang-ikamayad nga eawas sa nasyon.
Raya hay naka-eusot eon sa ikaywang pagbasa pinaagi sa viva voce.
Ginabag-o ro proposed bill nga Universal Health Care (UHC) Act ag nagataeana it anumang pagbag-o sa kontribusyon it PhilHealth nga dapat sigon hay nakabase sa actuarial studies nga paga-usisaon it sangka independiyenteng organisasyon ag paga-aprubahan it Kongreso kada budget deliberations.
Sa idaeum it proposisyon, indi eon kinahangean nga bayaran it bilog it mga Overseas Filipino Workers (OFWs) ro andang PhilHealth contribution. Sa baylo, 50% kara hay pagasabton it andang employer, samtang ro nabilin nga katunga hay pagabayaran it gobyerno.
Gintaeana man it laye nga dapat nga limitahan sa 7.5% it kabilugan nga gastos it PhilHealth ro administrative expenses, kaibahan ro suweldo it mga empleyado.
Gindayaw man ni Health Secretary Ted Herbosa ro pagpasa it proposisyon ag gina-insister ro papel ni Representative Stella Quimbo sa pagdepensa sa probisyon angot sa administrative expenses.
Dugang pa kara nga ginapasugtan it proposisyon ro mga siyudad ag munisipalidad nga magpatindog it Special Health Fund sa idaeum it pag-giya it Department of Health, Department of Budget and Management, ag UHC Coordinating Council.
Nauna eon nga gin-aprubahan it Senado ro kaugalingon nga bersyon kara, ro Senate Bill 2620, ko Agosto 2024.
