KALIBO, Aklan–Ginatun-an pa it natungdan nga komite sa Sangguniang Panlalawigan ro ginaproponer nga Boracay Island Development Authority ukon BIDA nga nauna eon nga ginmitlang ni Pangueong Rodrigo Duterte sa anang ika-limang State of the Nation Address (SONA).
Suno kay SP consultant Odon Bandiola nga matsa bukon it kumbinsido sa nasambit nga proposisyon ro mga stakeholders sa isla ag bilog nga probinsiya it Aklan bangud sa pagpati nga pagasakupon kara ro function ukon gahum it lokal nga gobyerno it Malay ag Aklan.
May posibilidad suno kana nga maskin ro operasyon ag pagdumaea it jetty ports ag terminal kamana man it transportasyon ag bilog nga ginaboe-an it kita sa Boracay hay pagaboe-on it BIDA.
Sa makaron sigon hay bukon pa it klaru ro tanan.
Mas nauna pa sigon nga gintalakay ro isyu it SP bangud nga owa pa raya naistoryahan sa committee hearing sa kongreso.
Pagkatapos nga maisapinal ro committee report it SP hay posibleng igapasa raya sa kongreso.
Posible man sigon nga magpasa it resolusyon nga nagasuporta ukon nagabasura sa pagpasa it BIDA.
Nauna eon nga ginpabutyag it Boracay Inter-Agency Rehabilitation Management Group (BIARMG) nga sa oras nga maging laye ro BIDA, raya ro magadumaea ag magasigurado nga magapadayun ro mga naumpisahan sa rehabilitation efforts sa Boracay.
