KALIBO, AKLAN — Uman nga nagkita matapos it haeos 29 anyos ro dating magnobyo apang, sa lamay eon it andang unga nga sambilog sa mga namatay sa natabong trahedya samtang naga paagto sa field trip sa Tanay, Rizal.
Naging masubo ag napuno it emosyon ro reunion it tatlo bangud sa sueod eon it kabaong ro andang unga nga bunga sigon it andang pagiging mag-first love.
Sa interview ng Bombo Radyo kay Katherine Escalona, ina it biktimang si Arneline Escalona Bonifacio, 15-anyos pa eamang sigon imaw kat mabuntis it dating karelasyon nga si Arnel Bonifacio apang, pagkatapos mag unga hay gin aywanan sigon imaw kara bangud sa kahadluk tuga it anang pagiging menor de edad.
Nagpadueong sigon si Arnel sa Manila ag naduea-an sanda it komunikasyon.
Gin pahayag pa it ina nga samtang, nagabahoe ro anang unga sa poder it anang lola hay mas gin handum kara nga makilaea ag makita it personal ro anang ama.
Agud mataw-an it katumanan ro gina hinyu it anang unga bisan sa ulihing kahigayunan, nakipag-angot ro anang pamilya sa Bombo Radyo Kalibo ag nag-post it mensahe sa social networking site agud mausoy ro ama ni Arneline.
Kat mabalitaan ni Arnel, insigida karang gin usoy ro burol it anang unga ag nakita nana raya sa panimaeay it lola ni Arneline sa Fairview, Quezon City.
