Natueopangdan it World Health Organization ro pagnaba it trend it mga kaso it global monkeypox.
Base sa datus, nakita ro pagnaba it 25.5 percent sa mga pangkalibutanan nga kaso sa 5,029 halin Agosto 29 hasta Setyembre 4, kumpara sa 6,746 nga kaso halin Agosto 22 hasta 28.
Apang, ginpahayag ni WHO director-general Dr. Tedros Ghebreyesus nga kapareho it pagsukoe sa COVID-19, bukon pa it oras para sa kalibutan nga magpabaya sa andang pagbantay.
Ro mga nasyon ag health workers hay nagakinahang-ean pa gihapon it suporta para magpahaum, makilaea, mausisa ag mabueong ro mga kaso ag malikawan ro mga impeksyon.
Ro Estados Unidos, Spain, Brazil France, Germany, United Kingdom, Peru, Canada, Netherlands ag Portugal hay nakalista it pinakamaabo nga numero it mga kaso ag nagabilog it 88 posyento it mga kaso nga nailista sa bilog nga kalibutan.
