Bukon eamang ro publiko ro dapat nga magsakripisyo sa tunga it pagtaas it presyo it langis kundi maskin ro gobyerno.
Suno kay Atty. Harry Sucgang, political analyst sa Aklan nga dapat nga ro unang magsakripisyo hay ro mga opisyal it gobyerno. Kinahangean suno kana nga maid-id nga pili-on it gobyerno ro iga-prayoridad nga pagagastusan it pondo.
Sa pihak nga parte, dapat man sigon nga magsakripisyo ro mga mabahoe nga kompanya it langis. Ro andang ginabayad nga excise tax hay ginapasa man nanda sa mga bumaeakae ag ordinaryong pumueuyu.
Sa kamatuoran suno kana ro tanan nga mga buwis kapareho it excise tax ag vat nga ginasukot sa mga mabahoe nga negosyo hay ginapasa man nanda sa mga consumer.
Buot hambaeon nga ro nagabayad it tax hay ro mga driver, mga ordinaryong pumueuyu ag mga pobre nga nagapas-an sa mga politiko ag mga manggaranon.
Sa tunga it krisis nga ginapangatubang bangud sa giyera it US ag Israel kontra sa Iran, ro eubus nga nagasakripisyo hay ro mga pobre. Apang ro masubo, kon mabahoe ro pagsakripisyo it mga pobre, owa masyadong naga antus ro mga politiko ag mga mabahoe nga negosyo.
Samtang, bangud nga owa man it mahimo ro ordinaryong tawo sa ginapangatubang nga krisis , dapat eon lang suno kana nga magtipid hasta nga matapos ro makarondaya nga sitwasyon.
