NEWS Analysis– Aminado ro kapulisan nga sa pihak it ginapatuman nga SIM card registration hay nagasinaka gihapon ro kaso it cybercrime sa nasyon partikular sa Metro Manila.
Suno sa Philippine National Police (PNP), 152% ro ginsaka it cybercrime sa unang an-um nga buean it dag-on.
Kun sa siin, umpisa Enero 1 hasta Hunyo 30, indi maganaba sa 6,250 nga cybercrimes ro ginpaabot sa pulisya.
Raya hay mas mataas it 2,477 nga nailista sa kaparehong tiempo ko nagtaliwan nga dag-on.
Eapnaag gihapon ro online scam nga nag abot sa 4,446 cases , grabeng pagtaas halin sa 1,551 nga insidente ko nagtaliwan nga dag-on.
Nakabaton man ro pulisya it indi magnaba sa 1,063 kaso it ilegal nga pag-access sa online sa unang an-um nga buean it 2023 — doble sa 570 nga kaso ko 2022.
Nagtaas man ro pagpangdaya sa ATM ag credit card sa first half it dag-on nga may 625 nga kaso, nga nag-grabe halin sa 241 nga nailistang insidente sa parehong tiempo ko nagtaliwan nga dag-on.
Ro masubo, sa pihak it SIM registration, posible pa sigon nga mag-grabe ro cybercrime bangud sa mga malware sa internet, technological development ag pagpabaya it online users.
Rason nga nagapabilin nga hangkat sa gobyerno ag publiko ro pagsukoe sa mga cybercriminals.
Kabay nga obrahon pa nga mas epektibo ro mga programa ag laye kontra sa mga nasambit nga abusado.
Kinahangean nga maging mas mautak, indi magpabiktima ag magbuylog para eubusang matapos ukon mabawasan man lang ro kaso it cybercrime.
