Sa pihak it mga kinahangeanon, bukon it kaparte it ginasueong nga P1 nga taas sa pamasahe ro grupong PISTON.
Base sa pahayag ni Mody Toque Floranda, Presidente it grupong PISTON, madja mawad-an eang raya it pueos ag kun tan-awon hay papas-anon ro kalisdanan nga epekto kara sa mga commuters.
Ginpanindugang nanda nga ro dapat nga himuon it gobyerno hay ro pakakas ukon pagpanaba it buwis sa produktong petrolyo para makapanipueos bukon eamang ro sector it transportasyon kundi pati eon man ro tanan nga pumueuyo.
Sa maabot sigon nga adlaw it martes hay ginaeauman nga maga-taas it P4.80/litro ro diesel, P3.00/litro it gasoline ag P4.40/litro sa kerosene. Samtang uwa pa raya napatuman, ro pagpataas it P1.80/litro it diesel makaron hay kapin eon sa P500 pesos ro naduduea nga kita it mga drivers.
Paathag ni Mody nga daywang dag-on eon nga naka-file ro nasambit nga proposisyon ag klaro man nga ro tensyon sa tunga it Israel ag Iran ro naging basehan it mga oil company ag gobyerno para sa pagpataas it langis. Apang, base sigon sa Department of Energy (DOE), haeos 10% eamang nga supply it krudo ro ginabuoe sa Israel ag ro 99% nga ginagamit nga krudo hay halin sa Dubai, ag may supply man halin sa Singapore.
Pahayag dugang ni Mody, dapat mag-angkon it klaro nga aksyon ro gobyerno angot kara kun paano masuspinde ro mataas nga buwis sa produktong petrolyo.
Naga-pati man sigon sanda nga ginagamit eamang nga rason ro tensyon sa Israel ag Iran para mag-angkon it pagtaas sa langis.
Nagapanawagan man sanda sa mga sektor it transportasyon sa bilog nga nasyon nga mag-himo it petisyon ag ipasa sa tagsa ka mga Sangguniang Panlalawigan para itikeod nga magpanawagan nga kakason ro mataas na buwis sa produktong petrolyo.
