Pagaumpisahan eon makaron nga adlaw ro publication it guidelines para sa unang bugso it pagsaka sa sweldo it mga government workers.
Tuyo kara nga masunod ro ginataeanang period para sa pagpatuman it sangka laye.
Raya hay matapos nga magtao it “go signal” ro Department of Budget and Management (DBM) sa mga ahensiya it gobyerno nga itao eon ro dugang nga sweldo sa andang mga workers.
Suno kay Budget Secretary Amenah Pangandaman, pirmado eon ro guidelines para sa salary increase adjustments sa sektor it mga trabahador sa mga taeatapan it gobyerno.
Sa isyu mat-a it pondong pagagamiton, pagaboe-on sigon raya sa personnel services budget it mga ahensiya ag kon kueang hay pagadugangan eon lang raya halin sa miscellaneous personnel benefits fund.
Apang, nakadepende gihapon sa kadasig nga magproseso it mga Human Resources Department it kada ahensiya it gobyerno nga sakop it laye.
