KALIBO, AKLAN — Arestado it mga otoridad ro sangka gina dudahan nga notorious gun for hire ag No. 1 most wanted person sa Makato, Aklan sa anang gina panagguan sa Sitio Igyoyo, Brgy. San Francisco Sur, Tibiao, Antique.
Gin kilaea ro naaresto nga si Redentor Tumulog, 29, private guard, residente it Brgy. Salazar sa nasambitang banwa nga hales tatlong dag-un eon nga naga pinanago sa kasuguan.
Si Tumulog ro gina turong nagpatay kay Michael Serrano kaibahan ro an-um nga iba pa nga puros mga miembro it gun for hire group nga “Bernesto Gang” ku Oktubre 30, 2013 samtang nakasakay sa anang motorsiklo sa Brgy. Tina, Makato, Aklan.
Ro operasyon hay pinaagi sa warrant of arrest nga gin pagowa ni Judge Nestor Bartolome it Branch 8 it Regional Trial Court, Kalibo, Aklan bangud sa kasong murder.
Owa it piyansang gin rekomendar para sa anang temporaryong kahilwayan.
Mag eowas kay Tumulog, inaresto man si barangay kagawad Jesus Mariano, 59, it Bandoja, Tibiao, Antique bangud sa pagtago sa wanted person kat abisuhan kara si Tumulog nga may naga paabot nga mga pulis.
Na-recover kana ro kalibre .38 nga baril nga kargado it an-um nga bala.
Ro operasyon hay pinaagi sa gintingub nga pwersa it Criminal Investigation and Detection Group (CIDG)-Aklan, Aklan Provincial Police Office (APPO) Provincial Intelligence Branch ag Trackers Team kamana man it Tibiao police station.
