KALIBO, Aklan — Nagapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002 ro sangka 25 anyos nga eaeaki matapos nga maaresto sa buy bust operation ko Sabado it gabi-i sa crossing Cubay Norte, Malay.
Ro suspek hay nakilaea kay Christopher Benignos, sangka habal-habal driver ag residente it Brgy. Dumlog, Malay.
Suno kay P/Major Frenzy Andrade, head it Provincial Drug Enforcement Unit ukon PDEU nga nabo-oe sa suspek ro sangka mabahoe nga sachet it ginpamaea nga dahon it marijuana kabaylo it P3,000 nga buy-bust money.
Halin sigon sa anang mga tanum nga marijuana ro anang ginabaligya sa anang mga parokyano nga kaeabanan hay halin sa isla it Boracay.
Sa ginpatigayon nga inventory, daywa pang mas mabahoe nga sachet it marijuana ro narekober.
Gindugang pa ni Major Andrade nga ginsalakay nanda ro lugar nga gina-alegar nga idtu ro tanum nga marijuana it suspek, apang owa eon pag-abot nanda sa lugar.
Ginasugid nga nakatanum sa daywang taeamnan ro marijuana ni Benignos nga nagataas it haeos 6 feet ro kada sambilog .
Sambilog sigon si Benignos sa andang mga target nga drug personalities sa banwa it Malay.
