KALIBO, Aklan — Nagaabot sa masobra tunga sa bilyong piso ro gintaeanang bulig it Deparment of Labor and Employment (DOLE) sa libu-libong mga trabahador nga naapektuhan it temporaryong pagpasarado sa Boracay.
Suno kay DOLE 6 regional director Cyril Ticao, raya hay igapaidaeom sa Adjustment Measures Program (AMP) ag Boracay Emergency Employment Program (BEEP) nga nagatuyong pagaayuson ro employability ag competitiveness it mga benepisyaryo ag mabawasan ro epekto kanda it rehabilitasyon sa isla.
Kaeakip sa mga nabaton nga bulig it kabilugang 19,279 nga benepisyaryo nga una sa formal sector hay P4,200 nga kada buean nga financial support sa sueod it an-om nga buean, pagpaidaeom sa skills training ag bulig agud makausoy it trabaho.
Sa pihak nga parte, kapin sa 5,005 nga trabahador sa informal sector ag mga indigenous people ro nataw-an it DOLE it emergency employment pinaagi it community work sa sueod it 30 diyas nga may sweldong P323.50 kada adlaw sa idaeom it Tulong Panghanapbuhay sa Ating Disadvantaged/Displaced Workers (TUPAD).
Pila pa sa mga programa it DOLE hay ro Government Internship Program, Livelihood Programs sa idaeom it DOLE Integrated Livelihood and Emergency Employment Program (DILEEP Kabuhayan) ag nagpatigayon eon man it mga job fairs.
