KALIBO, Aklan—Ginpaathag it pamunuan it Kalibo Municipal Disaster Risk Reduction Management Office ukon MDRRMO nga aktwal ro andang pagdetermina sa heat index sa banwa it Kalibo.
Suno kay Mr. Terrence June Toriano, head it MDRRMO Kalibo nga raya hay bangud sa kawad-an it automated weather station nga maga-predict sa heat index sa masunod nga adlaw bukon it kaparehas sa mga kaeapit nga probinsya it Roxas ag Iloilo hay insigida raya nga madetect.
Apang, ginduea ni Toriano ro kabaeaka it publiko bangud nga ro probinsya it Aklan hay maabo gihapon nga mga kakayuhan ag sa banwa it Kalibo hay may bakhawan nga nagapa-cool down sa temperatura.
Ro importante suno kana hay ro preparasyon it kada isaea agud nga inde mabutang sa aeang-aeang ro ikaayong eawas.
Panugyan ni Toriano nga likawan nga magbuead sa initan ag kon inde malikawan ro pila ka mga transaksyon hay siguraduhon nga magdaea it payong, kaeo ag kon anu pa man nga panangga sa init it panyempo.
Mag-inom it maabong tubi ag magsuksok it presko nga eambong.
Ginaeauman nga magapadayon pa ro naeksperyensyahan nga init it panyempo hasta sa masunod nga buean apang kunta suno kay Toriano hay inde eon kita mag-eampas sa ginaforecast nga heat index kaparehas sa mga kaeapit probinsya sa rehiyon.
