KALIBO, Aklan— Hugot nga ginamabaliran it Henann Group of Resorts nga ginapanag-yahan it negosyanteng si Dr. Henry Chusuey ro napabalitang pagsumite sigon it pekeng environmental compliance certificate (ECC) sa Department of Environment and Natural Resources (DENR).
Gin-insister ni Isabel Garcia-Lee, Hennan assistant vice president for sales sa Boracay nga uwa sanda it ginmanduan nga magsumiter it unofficial ukon pekeng dokumento para sa andang kompaniya.
Ro pagpalsipika sigon it mga dokumento hay sangka krimen nga may nagakaigong penalidad nga inde nanda dapat paghimuon.
Mabahoe ro andang pagpati nga may mga tawong gustong samaron ro maayos nga pangaean it andang kompaniya.
Sa press conference ko Lunes it hapon sa unang adlaw it dry run para sa uman nga pagbukas it isla sa Oktubre 26, ginpahayag ni Department of Tourism Secretary Bernadette Romulo-Puyat nga nakibot raya kat makit-ang peke ro ECC it nasambitang resort.
Nauna eon kara nga nagpaandam si Environment Undersecretary Benny Antiporda nga mahimong magapangatubang sa nagakaigong kaso ro resort kon mapamatud-ang fake ro andang ECC nga gin-insyu sigon ko Oktubre 8.
Nasayuran nga bukon it kaibahan ro limang resorts it Henann sa 68 establisimentong gintaw-an it “go signal” it DOT.
Ro ECC hay sambilog sa mga importanteng requirements agud mataw-an it accreditation it DOT ro sangka establisimento para makabaton it bookings sa reopening it Boracay sa masunod nga dominggo.
Hugot man nga igapatuman it inter-agency task force ro “no compliance, no opening” policy agud masigurong makasunod ro mga establisimento sa andang rules and regulations.
Ginpaandaman man ni Secretary Puyat ro publiko nga likawang makipag-transaksyon sa mga bukon it accredited nga hotels and resorts agud inde maunsyami ro andang bakasyon.
