Kalibo Aklan——-Masyadong nadaea ro sangka hilong nga eaeaki sa United Kingdom sa anang pagtan-aw sa concert ni Celine Dion rason nga ginbayluhan nana ro anang pangaean it kapareho sa Canadian singer.
Bangud nga lango sa aeak, owa sa tamang paminsaron ro 30-anyos nga si Thomas Dodd kat obrahon nana ro aplikasyon sa Internet agud nga legal nana nga mabag-o ro anang pangaean ag mabayluhan raya it “Celine Dion.”
Maskin nga hilong, nahimo sa gihapon ni Dodd nga bayaran online ro $150 dollars ukon P7,500 pesos nga application fee.
Insigida man nana nga nakalipatan ro anang ginhimo matapos imaw nga maumpawan rason nga eubus ro anang pagkakibot matapos ro pilang adlaw kat makabaton imaw it sueat nga nagahambae nga sertipikado eon ro anang pagbaylo it pangaean .
Maskin nga ko una hay haeos himatayon imaw kat ma-realize ro anang gin-obra hay desidido man imaw nga panindugan raya ag eubusan nga gamiton ro anang bag-ong pangaean.
