Kalibo Aklan ——–Ginpaburan ni Pangueong Rodrigo Duterte ro hinyu it Boracay Inter-Agency Task Force (BIATF) nga mapaeawig pa ro andang termino sa pag-rehabilitate sa Isla .
Base sa Executive Order No. 115 nga ginpirmahan ko Mayo 11, ginpaeawig pa it Pangueo ro kabuhi it BIATF hasta sa Mayo 2021 .
Tuyo kara nga matutukan ro pagtapos sa mga nagapadayun nga mga kritikal nga rehabilitation projects sa idaeum it Boracay Action Plan sa bantog nga beach destination kamana man ro implementasyon it carrying capacity regulations.
Ro BIATF hay gintukod sa idaeum it Executive Order No. 53 ko 2018 agud nga limpyuhan ag ipaidaeum sa rehabilitasyon ro Boracay.
Apang raya hay nabungkag ko nagtaliwan nga Mayo 8, 2020.
Kaeakip sa ginatutukan it Boracay Action Plan ro pag-ayos it drainage system, pag-demolish sa nabilin nga mga establisimento sa forest land ag wetland areas, pagpatuman it beach ag road easements, kamana man ro rehabilitation it Boracay circumferential Road.
Nakabaehag sa EO 115 it Pangueo nga haeos 33 porsiyento pa it mga establisimento sa Boracay ro owa pa naka-comply sa 25 plus 5 meters beach easement .
Kapin sa 27 porsiyento it establisimento ro owa naka-comply sa road easement sandig sa naga-eksister nga laye.
Nasayuran nga maskin gin-demolish eon ro 111 nga mga structures sa wetlands, 227 structures sa beach easement ag 896 sa karsadahon umpisa ko 2018, may una pa nga 723 structures nga ginpatindog sa forestland, 112 sa beach easement, ag 334 sa road easement.
Ginpasarado ro sikat nga tourist Island sa sueod it 6 nga buean ko 2018 agud nga mataw-an it daean ro maeapnagon nga rehabilitation sa tunga it problema sa polusyon .
Ro temporaryo nga closure hay ginmandu it Presidente matapos nga bansagan ro Isla nga “cesspool” ukon matuead sa sangka poso-negro.
