Magapabilin sa kasong grave threats kontra kay Vice President Sara Duterte ro hukom it Quezon City Regional Trial Court Branch 98 matapos pamalibaran ro mosyon it bise presidente nga mag-inhibit raya sa kaso.
Ginkumpirma it Department of Justice ag abogado ni Duterte nga ginbasura ni Judge Maria Angelica de Ramos ro hinyu nga boe-on imaw sa kaso.
Suno sa abogado ni Duterte nga si Paul Lim, gina-respeto it bise presidente ro desisyon apang pagagamiton gihapon kara ro tanan nga legal nga remedyo nga pwede nanda nga obrahon. Owa eon nagtau it dugang nga detalye ro DOJ ag depensa bangud nga naka-pending pa sa korte ro isyu.
Nagapangatubang si Duterte sa tatlong counts it grave threats angot sa anang online press conference ko Nobyembre 2024, kun sa siin ginhambae nana nga may naka-istorya eon imaw nga tawo angot sa pagpatay kay Pangueong Ferdinand Marcos Jr., First Lady Liza Araneta-Marcos ag dating Speaker Martin Romualdez engkasong madayun sigon ro planong pagpatay sa kana.
Ko Setyembre 5, nagbayad si Duterte it ₱360,000 piyansa, sang adlaw matapos magpaguwa it arrest warrant si Judge De Ramos.
Samtang, nasuspinde ro arraignment nga nakataeana kunta ko Setyembre 11 matapos daehon ni Duterte sa Supreme Court ro isyu sa kaso ag ginpamilit ro anang immunity halin sa pagpasaka it kaso bilang incumbent impeachable official.
Ko Setyembre 8, nagpahayag man it suporta sa hukom ro Kapunungan sa mga Pilipinong Hukom (Hukom) matapos raya nga makabaton it batikos ag online attacks angot sa pag-isyu it warrant.
