NATIONAL News — Ginrekomenda it House quad committee nga pasakaan it kasong kriminal si dating Pangueong Rodrigo Duterte ag dating mga aides kara nga sanday Senator Ronald “Bato” dela Rosa ag Christopher “Bong” Go.
May kaangtan raya sa pagkaeakot nanda sa extrajudicial killings sa nagtaliwan nga administrasyon.
Sa progress report it Quad Committee nga ginbasa ni quad committee chairperson Surigao Del Norte Rep. Robert Ace Barbers, klaro ro pageabag nanda ag kinahangean sanda nga pasakaan it kaso sa idaeom it Section 6 ukon other crimes against humanity it Republic Act 9851 ukon kilaea bilang “Philippine Act on Crimes Against International Humanitarian Law, Genocide ag pilang Crimes against Humanity.
Kaibahan man nga ginrekomenda nga pasakaan it kaso sanday dating PNP chief Oscar Albayalde , Debold Sinas, dating police officers Royina Garma, Edilberto Leonardo ag Palace aide Herminia “Muking” Espino.
Dugang pa ni Barbers nga katong Nobyembre 13 kat ginpatawag ro dating pangueo hay ginkumpirma nana ro pag-apruba it reward system nga target ro mga drug personalities gamit ro habilin nga campaign funds para magamit sa reward system.
Ginkumpirma man ni Duterte katong ginpatawag raya sa senado nga gina-engganyo kara ro mga kapulisan nga piliton nga magsukoe ro mga suspetsado nga nadakpan para ma-justify ro nasambit nga pagpatay.
Ginsumite eon it House of Representatives ro findings ag recommendations it Quad Comm sa mga ahensiya para sa nagakaigo nga aksyon.
