KALIBO, Aklan—Nagapadayon ro pagprotesta it mga pumueoyo sa Sri Lanka maskin nga nagsumite eon it resignation email si President Gotabaya Rajapaksa sa Parliament ag naglayas eon raya sa mismong ginapamunuan nga nasyon.
Suno kay Bombo International Correspondent Christina Sorongon nga ro pagpadayon sa hub-eag protesta it mga pumueoyo makaron hay para kay acting president it Sri Lanka nga si Prime Minister Ranil Wickremesinghe.
Ginapatihan sigon it mga pumueoyo nga kakuntyaba imaw sa mga anomalya ni Rajapaksa rason nga uwa sanda naila nga raya ro magpungko sa pwesto sa ginaeauman nga eleksyon it parlyamento sa Hulyo 20.
Madinaeag-on nga napalayas it mga protesters ro Sri Lankan president kaibahan ro anang bilog nga pamilya matapos nga ginsalakay it mga raya ro government building.
Nagpaamulyaw ro gamhanan nga lider sa Maldives hasta nga nakaabot it Singapore ag idto imaw makaron temporaryo nga nagatinir kaibahan ro anang pamilya.
Ginpahayag dugang ni Sorongon nga malisod ro andang pagpangabuhi makaron sa nasambit nga nasyon bangud sa bagsak nga ekonomiya nga nagtuga it krisis sa pagkaon, kwarta ag maabong iba pa.
Madumduman nga nag pool party pa ro mga protesters sa sueod it residenya it presidente agud nga masamitan it mga raya ro hamungaya nga pagpangabuhi it andang lider bangud sa pagkamkam sa kaban it gobyerno ag sa iba pang anomalya nga nagakinatabo sa nasyon.
