NEWS Analysis– Sang oras ag 10 minutos ro naging diskurso ni President Ferdinand Marcos Jr. sa anang ikaywang State of the Nation Address (SONA) ko Lunes.
Maabu imaw nga mga ginpabugae nga nasabat nga mga problema sa sueod it sang dag-on nga pagpanerbisyo.
Kaibahan kara ro programa sa pabaeay para sa mga pigado.
Maabu eon ro nataw-an it baeay apang pagapaeawigon pa sigon raya.
Masobra sa sang milyong kabaeayan ro igatau it anang administrasyon sa mga pigado sa bilog nga nasyon.
Angot mat-a sa mga mangunguma, ginpahayag it Presidente nga ro pagiging laye it New Agrarian Emancipation Act hay magatau it kasoehayan sa mga may utang sa eugta.
Ginpromisa sigon nana raya sa anang unang SONA ag natabu eon matapos nga maging laye ro bag-ong Agrarian Emancipation Act.
Ginduea it laye ro 57 bilyon pesos nga utang nga ginapas-an it 600,000 nga benepisyaryo.
Ginpabugae it Presidente ro pag-umwad it ekonomiya ko 2022 kun sa siin nakapagposte it 7.6 percent, pinakamabahoe sa sueod it 46 anyos.
Sa pagpa-obra it mga karsada, ginpahayag ni Marcos nga magakonekta eon ro tatlong mabahoe nga isla sa nasyon.
Suno pa kana nga ro 1,200-kilometer Luzon Spine Expressway Network Program hay nakataeanang magakonekta sa Ilocos hasta sa Bicol, nga kun sa siin ro dating 20 oras nga biyahe hay magiging siyam nga oras eon lang.
Angot sa Water Resource Management, ginhambae ni Marcos nga pagasiguraduhon nana nga may bastante ag malimpyo nga tubi para sa tanan ag sa masunod nga mga henerasyon
Nakikipag-angot eon sigon imaw sa Kongreso agud nga maipasa ro laye sa pagtukod it Department of Water Resource Management.”.
Sa kampanya sa illegal drugs, ginpahayag ni Marcos nga magapadayun raya apang makaangkon it bag-ong itsura.
Makaangkon it community-based treatment, rehabilitation, education, ag reintegration agud nga masolbar ro problema sa droga.
Ginpasiguro man kara ro pagpanupod it benepisyo sa healthcare workers (HCWs) it andang COVID health emergency allowance ag iba pang naka-pending nga benepisyo agud nga mabalikan ro gin obra nanda nga pagsakripisyo ko pandemya.
Maabu pang ginplastar ag ginpromisa ro Presidente apang ro pinakamasustansiya sa tanan hay ro anang ginhambae nga paga-eagson ro mga smugglers ag hoarders it agri products.
Ginpaandaman nana ro mga raya.
Hueuyapon eon sigon ro adlaw it mga raya.
Bukon sigon it tama ro andang gina-obra.
Napapahamak sigon bukon eamang ro mga mangunguma kundi ro mga bumaeakae.
Hueuyapon eon ro adlaw it mga smugglers.
Raya ro pinakamanami sa mga ginhambae ni Marcos.
Ro pangutana hay kon makaangkon raya it katumanan.
Ukon panibag-ong pagpamaeag eang.
