KALIBO, Aklan—Ginabantayan makaron it mga otoridad ro isla it Boracay bilang kaparte it paghugut it seguridad kasunod it amat-amat nga pagbuhos it mga dumueo-o ag lokal nga turista.
Suno kay Police Lieutenant Colonel Don Dicksie De Dios, hepe it Malay Municipal Police Station nga nag-deploy sanda it mga tawuhan sa bilog nga isla eabi eon sa beach front, hotels, bar ag restaurants para masiguro ro seguridad ag kaeuwasan it mga bakasyunista.
Sabat sigon nanda raya sa direktiba ni PNP Chief General Dionardo Carlos nga mas pang pabaskugon ro operasyon kontra krimen ag pagpatuman it health protocols sa Boracay.
Raya hay matapos nga ipaidaeom it Inter-Agency Task Force (IATF) ro bilog nga probinsya it Aklan kaibahan ro Antique, Bacolod City, Capiz ag Negros Occidental ag iba pang lugar sa Western Visayas sa Alert Level 2.
Dugang pa ni De Dios nga nagataas eon ro numero it mga turistang nagasueod sa Boracay nga haeos daywang dag-on nga naapektuhan it pandemya.
Mag-eowas sa pagpasiguro sa kaeuwasan it mga bakasyunista ag residente sa paeag it pandemya, ginatutukan man nanda ro mga nagaplano nga maghimo it maeain.
Ginpasiguro man kara ro pagtao it 24/7 police response it masobra 300 tourist police nga nakataeana sa limang sub-stations sa banwa it Malay.
