KALIBO, Aklan—Nag-aeabutan eon ro iba pang augmentation force para sa selebrasyon it Kalibo Sto. Niño Ati-atihan Festival 2020.
Suno kay P/Lt. Col. Richard Mepania, hepe it Kalibo PNP nga matapos nga ma-briefing sa Aklan Police Provincial Office (APPO) sa mga do’s and don’t’s hay gin-deploy sanda sa festival zone ag iba pang mga estratehikong lugar sa banwa it Kalibo.
Nasayuran nga kapin sa 1,700 nga pulis ro gin-request sa Police Regional Office (PRO)-6 agud nga magbantay sa peace and order sa sang dominggo nga selebrasyon nga nag-umpisa ko Enero 10 ag magatapos sa Enero 19.
Uman nga ginpadumdum ni Mepania sa mga gustong makisadya nga hugut nga gina bawae ro pagdaea it mga mabahoe nga bags, glass bottled drinks, pagpanigarilyo ag mga mataeum nga bagay.
Mag-eowas kara, nagpaandam man imaw sa mga progresibong grupo nga bawae ro mag-display it mga anti govt. slogans sa tuyo nga maging maayos ag relihiyoso ro festival.
Samtang, ginlaygayan man nana ro publiko eabi eon ro mga deboto, balikbayan , mga turista ag bisita nga indi magduha-duha nga magdangop sa andang gintukod nga police assistance desk para sa nagakaigo nga impormasyon ukon bulig.
