KALIBO, Aklan—Naga-abot sa 32,452 ro numero it mga turistang bumisita sa isla it Boracay ko buean it Oktubre.
Base sa record it Malay Tourism Office, sa nasambit nga numero, 22,251 kara ro naghalin sa National Capital Region (NCR) samtang ro 2,935 hay halin sa Calabarzon ag 2,475 ro taga-Aklan.
Apang mas manaba ro nasambit nga numero kumpara sa tourist arrivals sa kaparehong period ko nagtaliwan nga dag-on nga kapin sa 35,108.
Raya eon ro ikaywang pinakamataas nga tourist arrival nga nailista sa isla makaron nga may pandemya.
Samtang, ginapahauman eon it lokal nga gobyerno it Aklan ro pagbuhos it mas maabu pang turista sa holiday season eabi pa ag ginhaeugaan eon ro mga COVID-19 restrictions sa Metro Manila.
Sa makaron, amat-amat eon nga ginabuksan ro Boracay sa mga turistang fully vaccinated eabi eon ro mga naghalin sa isla it Panay kaibahan ro Guimaras, kun sa siin indi eon kinahangean ro swab tests.
