KALIBO, Aklan—Nagapati si Atty Harry Sucgang, sangka political analyst sa Aklan nga may eamod pamulitika ro gindihon nga daywang impeachment complaint kontra kay Vice President Sara Duterte sa Kamara.
Suno kana nga ro nasambit nga tikang hay kaparte it plano it pilang mga indibidwal nga gusto nga magpabagsak kana.
Partikular nana nga ginmitlang ro ginasugid nga ambisyon ni House Speaker Martin Romualdez nga magpadaeagan bilang pangueo ukon magsueong it charter change para maging prime minister kun engkaso nga indi makabo-oe it boto it mga tawo.
Dugang pa nga potential candidate gihapon si VP Sara sa maabot nga presidential election sa 2028.
Sa pihak nga parte, nakadepende sigon sa mandu ni Pangueong Ferdinand Marcos Jr., kon paga-obrahon nga urgent ro pagpasa it articles of impeachment kontra sa bise presidente agud nga mapasaka eon raya sa senado.
Raya hay kasunod it pueong it presidente ag mga kongresista sa Malakanyang kahapon nga gintawag nga sangka fellowship.
Ginpahayag ni Atty Sucgang nga owa pa it impormasyon kon natalakay sa pueong ro nakadihon nga impeachment complaint.
Makabig suno kana nga paghugas it alima ro naunang pahayag ni Marcos nga indi nana pagasuportahan ro impeachment complaint kontra kay Duterte, kun sa siin ginasugid nga pag-uyang eamang it oras ro pagpahalin kana sa pwesto.
