Gin-anunsyo ni Senate Impeachment Court presiding officer Chiz Escudero nga owa it impeachment trial sa Lunes, July 27 ag sa Martes, July 28.
Suno kay Escudero, raya hay agud nga taw-an it daean ro ika-limang State of the Nation Address (SONA) ni Pangueong Ferdinand Marcos Jr., sa maabot nga Lunes samtang sa Martes mat-a hay pagataw-an it daean ro kontra-SONA it minorya nga kaparte eon it tradisyon it daywang kapueungan it Kongreso.
Ginpahayag ni Escudero nga ro masunod nga pagbista sa masunod nga domingo hay pagahiwaton sa Miyerkules, July 29 apang umpisa sa raya nga adlaw hay paga-umpisahan eon ro impeachment trial alas-10:00 it agahon hasta alas-4:00 it hapon.
Magapabilin nga Lunes hasta Miyerkules ro adlaw it impeachment trial.
Makaangkon eamang it sang oras nga break ukon pahuway ag pag-abot it alas-4:00 it hapon hay igataeana raya para sa sesyon ag sa committee hearings.
Raya eon ro pagasundon nga schedule it Senado para matunga ro andang oras ag obligasyon bilang senator-judge ag mga mamalidha.
Samtang, makaron it alas-2:00 it hapon hay uman nga maga-atubang sa impeachment trial si NBI Director Melvin Matibag para sa pagpadayun it cross-examination it defense team ag sa padayun nga interjections it mga senator judges.
