KALIBO, Aklan — Nagapati si Atty. Plaridel Morania, sangka political analyst sa Aklan nga dapat nga ginpadayun it Senado ro impeachment trial ni Vice President Sara Duterte.
Suno kana nga pormal eon nga nakapanumpa si Senate President Chiz Escudero bilang presiding judge it impeachment court kamana man ro mga senador bilang impeachment judge.
Apang pilit suno kana nga naga-usoy it teknilidad ro pilang senador rason ko ulihi hay gindesisyunan it Senado nga ibalik ro articles of impeachment sa House of Representatives.
Ginpahayag ni Atty. Morania nga raya hay hayagan nga pagbalewala sa obligasyon nga gintaeana it Konstitusyon.
Dapat suno kana nga magpangibabaw ro patriotism it mga senador.
Maskin nga ro impeachment hay sangka number game, apang dapat suno kana nga gintaw-an it kahigayunan it senado ro prosekusyon nga iplastar ro andang kaso, kamana man gintaw-an it kinamatarung ro bise presidente nga kuwestiyunon ro mga pasibangud kontra kana.
Pag-abswelto ukon conviction eamang suno kana ro pwede nga maging desisyon kara it mga senador bilang mga hukom it impeachment trial.
Ginpahayag pa ni Atty. Morania nga kon owa naka-estudyo ro mga senador, dapat nga gingamit nanda ro andang sentido-kumon kon ano ro tama ag saea.
Pebrero 5 pa sigon gin-impeach it Kamara si Duterte ag kon pagasundon ro proseso it impeachment base sa 1986 Constitution, dapat insigidang ginbilog ro Senado bilang impeachment court ag gin-umpisahan ro trial.
