KALIBO, Aklan—Gin-insister ni Dr. Arjay Nagit ro importansiya it mass testing para sa COVID- 19 sa nasyon.
Suno kana nga dapat nga magtaeana it pondo si Pangueong Rodrigo Duterte halin sa P275 billion nga pondo nga nakabaehag sa gin-aprubahan nga “Bayanihan to Heal as One Act” agud nga masuk-ean ro makamaeatay nga virus.
Kinahang-ean suno kana nga makaangkon it bastante nga testing kits agud nga maskin ro mga frontliners hay ma-test ag makapangaman eagi engkaso nga makaangkon it infection.
Gindugang pa ni Dr. Nagit nga epektibong pangsukoe sa sakit ro pirmeng paghugas it alima, pagpabaskog it resistensiya ag magsuksok it surgical mask kon maeain ro pamatyag.
Mayad man sigon ro mag-inom it vitamin c nga tableta, apang dapat nga 500 mg. eamang sa sueod it sang adlaw bangud kon magsobra hay posibleng magtuga it kidney stones.
Dapat man sigon magsunod sa mga panugyan it gobyerno samtang nga ginapatuman ro enhanced community quarantine eabi eon ro physical distancing, curfew, ag pagbilin sa sueod it baeay kon owa it importanteng paeanawon.
