KALIBO Aklan– Sa bulig it impormasyon it mga pumueoyo, nasagupa it tropa it gobyerno ro inde magnaba sa 20 ka mga New Peoples Army ukon NPA sa Sitio Itabag, Brgy. Manika, Libacao.
Suno kay Lt.Col. Vicel Jan Garsuta, chief it division public affairs office it 3rd Infantry Division it Philippine Army nga regular ro pagpatrolya it mga soldado sa lugar kon sa siin nakabaton sanda it impormasyon nga may mga armadong indibidwal nga nagapanago sa nasambit nga kabukiran.
Angot kara, nakumpirma ro report nga naging rason it engkwentro sa tunga it magtimbang nga grupo.
Ginpahayag dugang ni Lt.Col. Garsuta nga ro nasambit nga grupo hay iya nagpaamulya sa kabukiran it Libacao agud nga makalikaw sa nagapadayon nga opensiba it mga militar sa mga kaeapit nga probinsya.
Iya eon sigon sanda naabutan it tropa sa probinsya it Aklan nga deklarado bilang insurgency free.
Posible nga gusto nanda nga mag-establisar it uman sa probinsya it Aklan apang nasakote sanda it tropa it militar kon sa siin ginapatihan nga maabo ro nalastruhan sa grupo it mga rebelde bangud sa mga mantsa it dugo nga nagkalhit sa nasambit nga lugar.
