NEWS Analysis– Padayun ro exodus it healthcare workers partikular ro mga nurses.
Nagakaubusan eon it mga nurses sa mga pampubliko ag pribadong ospital bangud nga naga-agto sa ibang nasyon kapareho it Great Britain, U.S. Middle East ag iba pang nasyon nga mataas magpasuweldo.
Indi sanda mabasoe bangud nga manaba ro suweldo it HCWs sa nasyon ag atrasado pa sa pagtau it mga benepisyo ag allowances.
Kinahangean pa nga magprotesta para mabatian ro reklamo angot sa atrasadong benepisyo.
Ko nagtaliwan nga dag-on, sunud-sunod ro mga ginapatigayon nga rally ag protesta it HCWs bangud sa atrasado nanda nga health emergency allowance.
Nagtililipon sa atubang it taeatapan it Department of Healh (DOH) ag nagpanawagan nga itau eon ro COVID allowance nga mabuhay eon nga owa gintau.
Suno sa mga nagprotesta medyu nakalipatan eon sanda it gobyerno sa pihak nga sanda ro frontliners kat magpanaeasa ro COVID ko 2020.
Kinahangean pa baea sigon sanda nga magpakalimos sa pihak nga ro andang ginapangayo hay anda man nga gintrabahuhan samtang nagapanaeasa ro pandemya?
Kabay nga maeo-oy man sigon ro gobyerno ag itau eon ro andang COVID emergency allowance.
Suno sa report, 1,617,600 HCWs pa ro owa nabayaran it andang health emergency allowance.
Nag abot sa P11.5 bilyon pesos ro dapat bayaran sa HCWs nga ro mabahoe nga parte hay sa mga nurses.
Suno sa Department of Budget and Management nagpaguwa eon sanda it P1.04 bilyon pesos para bayaran ro 55,211 HCWs.
Owa man nasayuran kon nakaangkon it katumanan ro ginhambae it DBM.
Kat mag-SONA si President Ferdinand Marcos Jr. ko Lunes, ginhambae nana nga igatau eon sa health workers ro andang COVID health emergency allowance.
Suno kay Marcos, para matupungan ro sakripisyo it health workers igatau eon sa mga raya ro allowance ag iba pang benepisyo.
Ro pagpabaya ro ugat kon ham-an nga maabu ro naghalin nga health workers para magtrabaho sa abroad.
Tumanon ro ginpromisa.
