KALIBO, Aklan—Indi maging kampante samtang nagapabilin pa ro coronavirus disease ukon Covid-19 pandemic.
Raya ro paandam it aklan police provincial office ukon APPO sa publiko.
Ginpadumdum ni P/staff Sgt. Crisel Lagatic , public information officer it APPO ro mga gustong mag-agto sa mga baybayon sa selebrasyon it san juan de bautista nga sundon ro quarantine protocols eabi eon ro physical distancing ag pirmeng pagsuksok it face mask agud nga malikawan ro pagkalhit it makamaeatay nga sakit.
Ro nagapanguna sigon nga rason kon ham-an nga ginhaeugaan ro mga quarantine restrictions hay bukon it agud nga engganyuhon ro mga tawo nga magguwa it andang baeay kundi nga mabuhi ro nagahina eon nga ekonomiya matapos ro pilang buean nga lockdown.
Dapat sigon nga makaangkon it disiplina ro publiko ag maging mapagbantay sa peligro nga hatud it virus.
Samtang, kapareho it nakasanayan, nagapatrolya suno kana ro pulisya sa mga baybayon ag kasubaan agud nga mabantayan ro hueag it mga tawo ag masiguro nga owa it maga-eabag sa health protocols. Sa makaron hay nagapabilin nga una sa modified general community quarantine ro Aklan.
