KALIBO, Aklan — Gin-umpisahan eon it pilang mga pumueuyu ro paglimpyo sa puntod it andang mga mahae sa kabuhi sa sueod it Milagrosa Cemetery sang domingo antes ro pista minatay .
Bangud kara, panawagan it pamunuan it nasambit nga sementeryo nga magbueuligan agud nga mapabilin ro kalimpyo sa lugar .
Suno kay Noberto Clarete, security guard ag caretaker it Milagrosa Cemetery nga bangud nga malimpyo ag maayos eon ro palibot, gin abisuhan nanda ro mga pumeuyu nga ibutang it maayos sa sako ro andang mga matipon nga basura ag hakuton sa guwa.
May gintaeana sigon ro simbahan nga tagalimpyo kaibahan ro pagputoe it mga sanga it kahoy ag pagbo-oe it mga halimunon bilang pagpahaum sa Undas.
Mataeupangdan suno kana nga maabu eon ro mga nagabisita sa sementeryo ag nagasindi it kandila ag nagadaea it bueak, apang maeaka pa ro mga nagapintura it mga pantyon.
Sa pihak nga parte, sa sueod it limang dag-on nga pagserbisyo bilang caretaker, ginpahayag ni Clarete nga may kahigayunan nga nagapaeanindog ro anang baeahibo bangud sa indi mapaathag nga mga hitabu, apang aminado imaw nga ro anang isip eamang ro nagapahadlok kana.
Maskin kan-o suno kana hay owa pa imaw nakakita it ginatawag nga moeto ag iba pang indi mapaathag nga elemento kapareho sa mga istorya it kababalaghan sa sueod it sementeryo .
Samtang , kaibahan sa mga prominenteng tawo nga naka eubong sa sementeryo hay si dating Congressman Allen Quimpo, mga kaparian ag iba pa.
