KALIBO, Aklan—Kabilugan nga 182,647 tourists ro nailistang tourist arrival sa isla it Boracay sa nagtaliwan nga buean it Abril.
Sa nasambit nga numero, 145,455 kara ro domestic tourist; 1,623 ro overseas Filipinos ag 35,569 ro mga foreign ukon dumueoong turista.
Ro nasambit nga numero it mga ngabisitang turista sa sikat nga isla hay daea gihapon it tuman nga kainit it panyempo kon sa siin mas ginapili it mga raya ro Boracay nga idto sa mala-kristal nga tubi-dagat magtampisaw makaron nga summer season.
Mag-eowas kara, maabo man nga water sports activities ro pwedeng maobra nga siguadong maga-enjoy ro tanan.
Sa gabie hay buhi man ro isla sa mga waea-tuo nga beach parties nga mas pang nagadugang sa enjoyment it mga bakasyunista.
Sa makaron hay nagapadayon ro promotion it lokal nga gobyerno it Malay agud nga mas pang makilaea ro mga tourist attraction sa banwa bukon eamang it ro isla it Boracay.
Nasayuran nga magapasakop ro lokal nga gobyerno sa igapatigayon nga 9th International Travel Festival 2024 (ITF2024) nga magaumpisa makaron nga Mayo 3 hasta it 5 sa syudad it Cebu
Ro tatlong adlaw nga event hay magapokus sa tema nga “𝐋𝐨𝐯𝐞 𝐭𝐨 𝐓𝐫𝐚𝐯𝐞𝐥,” kon sa siin igahighlight kara ro importansya it pag-explore it wonders of the Philippines.
Makit-an sa event ro mga nagkaeain-eain nga ahensya ag stakeholders halin sa isla it Boracay nga magatanyag it travel ag adventure sa mga turista.
