BORACAY, Island — Sueod sa unang pwesto sa listahan it “10 Stunning Beaches in Asia for 2025” it NDTV, sambilog sa pinakasikat nga website sa India ro isla it Boracay kon sa siin, uman nga ginpamatud-an kara ro pagiging world-class nga destinasyon nga ginapalangga it mga travelers halin sa nagkaeain-eain nga bahin it kalibutan.
Ro nagapabilin nga kaanyag it Boracay hay padayon nga nagabuoe it atensyon ag tagipusuon it mga bisita nga ginahimo raya nga sangka inde malipatan nga eksperyensya sa kada pagbisita ag nagapakita it mas malig-on nga turismo para sa padayon nga pag-umwad it ekonomiya it probinsya it Aklan.
Angot kara, pamatuod ro pagpabilin it libo-libong tourist arrival sa sueod eamang it daywang dominggo sa buean it Marso kon sa siin, nakalista ro Malay Tourism Office it kabilugang 82,156 tourist nga bumisita sa Boracay halin March 1-15, 2025.
Sa nasambit nga numero, 64,615 dikara ro domestic; 1,047 ro overseas Filipino’s samtang 16,494 mat-a ro foreign tourist.
Sa pihak nga parte, uman nga gin-insister ni P/Capt. Aubrey Ayon, tagapaghambae it Aklan Police Provincial Office ro hugot nga pagpatuman it seguridad sa Boracay agud masiguro ro syento porsyento nga kaeowasan it tanan.
Uwa suno kana it dapat nga ikabaeaka ro mga turista, bakasyunista ag mga bisita bangud sa nagapabilin nga eowas pamasyaran ag bakasyunan ro bilog nga isla it Boracay.
