INTERNATIONAL News — Ginpamalibaran it Israel ro panawagan it kaabuan nga mga nasyon nga ceasefire kontra sa Hezbollah sa Lebanon.
Raya hay kontra man sa ginaduso it andang pinakamabahoe nga kaalyado nga United States, bangud nga nagapadayon gihapon ro Israeli force sa pag-atake nga ginkamatay it ginatos nga katawo sa Lebanon ag nagpataas pa it kahadlok sa posible nga ‘all-out regional war’.
Sa pihak it panindugan it Israel, nagapabilin ro katuyuan it U.S. ag France para sa 21 diyas nga pag-pundo anay it giyera ag pagpadayun it mga negosasyon eakip ro ginahimo sa sidelines it United Nations meeting sa New York.
Samtang, gintamaan it Israeli warplane ro capital nga Beirut nga ginkamatay it daywang katawo ag ginkanina it 15 nga iba pa eakip ro sangka babaye nga una makaron sa kritikal nga kondisyon.
Raya hay base sa kumpirmasyon it health ministry it Lebanon.
Bangud kara, naga-abot eon sa 600 ro mga nagkaeamatay umpisa ko Lunes, September 23.
Napatay man sa pag-atake ro head it sambilog sa mga air force units it Hezbollah nga si Mohammad Surur.
Suno sa grupo, raya ro pinakabag-o nga Hezbollah commander nga napatay sa pilang adlaw nga assassinations nga naga-target sa mga matag-as nanda nga mga opisyales.
Ginkumpirma it Israel nga gin-atake nanda ro ginaboeobanta nga 220 nga mga Hezbollah targets sa nagtaliwan nga mga inadlaw.
