KALIBO, Aklan—Padayon ro pagpadumdom it Italian government sa andang mga pumueoyo nga magdoble dahan.
Raya hay kasunod it sigidas nga pagtinaas it kaso it 2019 coronavirus disease ukon COVID-19 sa nasyong Italya.
Suno kay Bombo International Correspondent Girlie Ongoco, tubong Iloilo City apang presenteng naga-istar sa Rome, Italy, kinahang-ean nga magsunod it mga tawo sa polisiya nga ginapatuman it gobyerno kon uwa sanda naila nga mamultahan ukon makulong.
Sa pihak sigon it pagstrikto it gobyerno hay padayon ro pagtinaas it kaso it mga nagpositibo sa COVID bangud nga sigidas ro transportasyon ag ro trabaho it mga workers sa mga bukas nga establisyimentong nagabaligya it mga essential goods.
Suno pa kay Ongoco, uwa it panic buying nga nagakatabo sa Rome, Italy bangud nga bukas ro mga manufacturer it mga essential goods ag uwa raya ginapasarado it gobyerno.
Ro iba suno kana hay nagabakae eagi it maabong supply agud nga inde eon sanda kaguwa ag natamaran eon magpila sa mga supermarkets ag grocery stores.
Sa pinakaulihing datos, ro Italy hay nakalista eon kapin sa 105,792 nga kaso it COVID-19.
Sa nasambitang numero, 12,428 kara ro namatay samtang 15,729 ro nakarecover.
