Kalibo Aklan —-Hugut nga ginapatuman it Jamindan Police Station ro boarder control sa boundary it probinsiya it Capiz ag Aklan .
Suno kay P/Major Peter John Pisueña , hepe it Jamindan PNP nga raya hay matapos nga ginpaidaeum eon sa Extreme Enhanced Community Quarantine ro probinsiya it Capiz matapos nga makalista it sangka kaso it coronavirus disease (COVID-19) sa Capiz ag tatlong kaso man sa Aklan .
Raya hay nagakahueugan nga owa it makasueod ag makaguwa sa nasambit nga boundary mag-eowas sa may medical cases.
Ginpahayag dugang nga may anda man nga close coordination sa Altavas Police Station angot sa ginapatigayon nga 24/7 checkpoints.
Mag-eowas sa Altavas, ginabantayan man nanda andang boundary sa banwa it Libacao ag Batan .
Nasayuran nga ro tanan nga mga nagabiyahe it goods hay ginapaeusot sa checkpoint basta nga may maipakita nga certified true copy it DTI permit/Mayor’s permit nga kon sa siin nakabaehag ro andang line of business ag resibo it delivery bilang pruweba.
Ro kutob sa mga nagasueod nga saeakyan hay gina-disinfect kaibahan ro mga tawo nga sakay .
Sa pihak nga parte, gindugang pa ni Major Pisueña nga sigidas man ro andang rekorida kaibahan ro mga katapo it Philippine Army sa pagpadumdum sa mga pumueuyu nga magpabilin sa andang mga baeay ag may partisipasyon man sa contact tracing sa nakasalamuha it kauna-unahan nga kaso it COVID sa andang probinsiya partikular sa Brgy. San Lucero Jamindan , Capiz.
