Gin-aprubahan it gobyerno it Japan ro kauna-unahang stem-cell therapy sa kalibutan kontra sa Parkinson’s disease nga ginaeaumang magamit eon it mga pasyente sa mga masunod nga buean.
Suno sa Sumitomo Pharma, ginpasugtan ro pag-obra ag pagbaligya it Amchepry, sangka treatment nga nagabutang it stem cells sa utok agud mabayluhan ro naduea nga selula nga nagahimo it dopamine sa mga may Parkinson’s.
Base sa pagtuon it Kyoto University, pitong pasyente ro nagpaidaeom sa nasambit nga therapy ag ginmonitor sa sueod it daywang dag-on.
Nagguwa nga eowas ro pagbueong ag ap-at kanda ro nagpakita it pagmayad it kondisyon.
Ro teknolohiyang ginamit hay ro induced pluripotent stem cells (iPS cells) nga nadevelop it Japanese scientist nga si Shinya Yamanaka, nga gintaw-an it Nobel Prize in Physiology ukon Medicine ko 2012.
Ginatantyang kapin sa 10 milyong katawo sa bilog nga kalibutan ro may Parkinson’s, sangka sakit sa nervous system nga nagatuga it pagpangurog ag kalisod sa paghueag.
